Juan Cofiño nun dirá a la misa de Cuadonga, disconforme con afirmaciones "estremes" de Sanz

La oposición critica, ensin rodeos, la falta de Barbón na misa de Cuadonga

El presidente de la Xunta Xeneral, Juan Cofiño, dio anuncia esti sábadu de que nun dirá’l 8 de setiembre viniente a la tradicional misa de Cuadonga por mor del Día d’Asturies en disconformidá coles afirmaciones "estremes" del arzobispu d’Uviéu, Jesús Sanz Montes, na celebración del añu pasáu.

Nuna carta abierta a Sanz Montes, na que-y reprocha’l conteníu de la celebración relixosa de la misa nel Real Sitiu en 2023, Cofiño dio anuncia de que nun dirá’l 8 de setiembre viniente, píde-y prudencia y fala del deséu de qu’esta "incidencia" seya l’anticipu d’una rellación "fluyida y respetuosa".

Ayeri, el presidente del Principáu, Adrián Barbón, confirmó que nun dirá la selmana viniente a la tradicional misa de Cuadonga por mor del Día d’Asturies, celebración a la que siempres fuere dende que tomó posesión del cargu va cinco años. "Nun quiero que la mio presencia seya la escusa perfecta pa xenerar griesca y tensión, daqué que nun va conmigo", señaló.